Bugun Qozogʻiston Respublikasi Nur-Sulton shahrida joylashgan “Korme” koʻrgazmalar markazida “Eurasian book fair-2019” IV Yevroosiyo xalqaro kitob koʻrgazma-yarmarkasi oʻz ishini boshladi. Koʻrgazmada Rossiya, Xitoy, Eron, Turkiya, Polsha, Belgiya, Ozarbayjon, Latviya, Ukraina, Armaniston, Tojikiston, Qirgʻiziston kabi mamlakatlardan jami 90 ta tashkilot, jumladan, Oʻzbekistondan Axborot va ommaviy kommunikatsiyalar agentligi tasarrufidagi nashriyotlar ishtirok etmoqda.  Koʻrgazma doirasida 150 dan ortiq tadbir tashkillashtirilgan. Barcha ishtirokchi-davlatlar vakillari tomonidan kitob taqdimotlari, badiiy kechalar, muallif, noshir, rassom va matbaachilar bilan uchrashuvlar oʻtkazish koʻzda tutilgan. Xalqaro kitob koʻrgazma-yarmarkasi doirasida “Eng yaxshi darslik”, “Eng yaxshi oʻlkashunoslik kitobi”, “Bolalar va oʻsmirlar uchun kitob”, “Madaniyat va sanʼat”, “Fan va innovatsiya”, “Gran-pri” nominatsiyalarida anʼanaviy “Yilning eng yaxshi kitobi” tanlovi oʻtkaziladi. Gʻolib va nomzodlarga maxsus diplom beriladi.
Eslatib oʻtamiz, “Eurasian book fair-2019” IV xalqaro kitob koʻrgazma-yarmarkasi 27 aprelga qadar davom etadi.

Bugun nashriyot jamoasi uzoq yillar davomida korxona faoliyati rivojiga oʻz hissasini qoʻshgan, butun umrini kitob nashr etishdek ezgu ishga bagʻishlagan Nashriyotning badiiy sexi katta ustasi Salavat Galimovni nafaqaga kuzatishga yigʻildi. Oʻzining 42 yillik faoliyati davomida jamoa mehri va hurmatini qozongan Salavat Galimovga Nashriyot rahbariyati va ijodiy xodimlari tomonidan iliq fikrlar aytilib, dil izhorlari yozilgan diplom va sovgʻalar topshirildi.
– Nashriyotimizda 650ga yaqin mutaxassislar faoliyat olib borsada, har birining jamoada oʻz oʻrni bor. “Oʻzbekiston” nashriyoti katta maktab. Oʻz kasbini sevgan, chinakam fidoiy xodimlarimizning borligi korxonamizning katta yutugʻi, - deydi nashriyot direktori O.Meliyev. “Mehnat qilsang, koʻksing togʻ, hurmat qilsang, diling bogʻ”, deb bejizga aytishmaydi. Zero, mehnatgina insonni yuksakka koʻtaradi, hayotiga mazmun bagʻishlaydi.

1950 yilda pivo ishlab chiqaruvchi Guinness kompaniyasining rahbari ser Xyu Biverning miyasiga turli jahon rekordlari aks etgan kitobni nashr ettirish fikri keladi. Mana 60 yildirki, ushbu kitob qahramonlarining yutuq va muvaffaqiyatlari millionlab insonlarni hayratdan yoqa ushlashga majbur etmoqda.
Dunyoga mashhur “The Guinness Book of Records” kitobining ilk nashri 1955 yil 27 avgustda dunyo yuzini koʻrdi. Dastavval reklama mahsuloti sifatida chiqarilgan kitob bir zumda butun mamlakat boʻylab ommaviy tarzda yoyila boshladi. Bir yil oʻtib u AQSHda nashr qilindi, bugungi kunga kelib esa kitob 100dan  ortiq davlatda 20 tilda bosib chiqarilmoqda. 1999 yildan boshlab kitob nomi rasmiy ravishda “Guinness. World Records” deb yuritila boshladi, sababi – ushbu loyiha endi nafaqat kitob, balki teleshou, muzey, veb-saytlar, raqamli kanallar, elektron kitoblarni oʻzida jamlay boshladi. U endilikda, hattoki toʻgʻridan-toʻgʻri efirga uzatiluvchi shouga ham aylandi.  
Bugungi kunda “Guinness. World Records” yiliga taxminan 50 000 talabgorning ishlarini koʻrib chiqadi va oʻz hakamlarini okean tubidan tortib dunyoning eng baland binosi boʻlgan Burj-xalifagacha joʻnatadi. Hozirda tashkilot Londonda oʻzining tahririyatiga ega, shuningdek, Nyu-York (AQSH), Tokio (Yaponiya), Pekin (Xitoy) va Dubay (BAA)dagi ofislarda ham vakolatxonalari mavjud.
Yuzlab yangi yutuqlar, aql bovar qilmas imkoniyatga ega insonlar, kun sayin yangilanib borayotgan rekordlar va albatta, koʻplab hayratomuz suratlar jamlangan “Ginnes. Jahon rekordlari” kitobi yurtimizdagi eng nufuzli nashriyot “Oʻzbekiston” NMIU tomonidan ilk bor oʻzbek tilida chop etildi. Ushbu nashrni varaqlay turib, siz kitob ustida ishlagan insonlarning davr talabiga hamohang tarzda dunyoda sodir boʻlayotgan yangi voqea-hodisalardan boxabar boʻlib borayotganiga va ushbu oʻzgarishlarni yorqin suratlarda ifodalashga harakat qilayotganiga amin boʻlasiz.
Maʼlum yoʻnalishga oid boʻlgan rekordlarni topishda oʻquvchilarga qulaylik tugʻdirish maqsadida ular alohida boʻlimlarga ajratilgan. Kitobda “Dunyodagi eng uzun lagʻmon”, “Moʻyqalamda ishlangan eng katta surat”, “Pahlavon ayol”, “Kuchli sochlar egasi”, “Fidoyi oʻqituvchi” kabi yoʻnalishlar boʻyicha hamyurtlarimiz tomonidan oʻrnatilgan koʻplab qiziqarli jahon rekordlari ham oʻrin olgan boʻlib, bu Sizni beeʼtibor qoldirmasligi shubhasiz. Ishonamizki, 60 yillik tarixga ega va dunyodagi eng koʻp sotiluvchi kitoblar qatoridan muqim oʻrin egallab kelayotgan rekordlar jamlanmasi sizga olam-olam zavq bagʻishlaydi.