Полная версия Изображения: Вкл Выкл    Размер шрифта: A A A    Цвет сайта: A A A A
TELEFONLAR
+99871 244-34-01
ISHONCH TELEFONI
+99871 244-37-81

Ginnes jahon rekordlari “Oʻzbekiston”da

1950 yilda pivo ishlab chiqaruvchi Guinness kompaniyasining rahbari ser Xyu Biverning miyasiga turli jahon rekordlari aks etgan kitobni nashr ettirish fikri keladi. Mana 60 yildirki, ushbu kitob qahramonlarining yutuq va muvaffaqiyatlari millionlab insonlarni hayratdan yoqa ushlashga majbur etmoqda.
Dunyoga mashhur “The Guinness Book of Records” kitobining ilk nashri 1955 yil 27 avgustda dunyo yuzini koʻrdi. Dastavval reklama mahsuloti sifatida chiqarilgan kitob bir zumda butun mamlakat boʻylab ommaviy tarzda yoyila boshladi. Bir yil oʻtib u AQSHda nashr qilindi, bugungi kunga kelib esa kitob 100dan  ortiq davlatda 20 tilda bosib chiqarilmoqda. 1999 yildan boshlab kitob nomi rasmiy ravishda “Guinness. World Records” deb yuritila boshladi, sababi – ushbu loyiha endi nafaqat kitob, balki teleshou, muzey, veb-saytlar, raqamli kanallar, elektron kitoblarni oʻzida jamlay boshladi. U endilikda, hattoki toʻgʻridan-toʻgʻri efirga uzatiluvchi shouga ham aylandi.  
Bugungi kunda “Guinness. World Records” yiliga taxminan 50 000 talabgorning ishlarini koʻrib chiqadi va oʻz hakamlarini okean tubidan tortib dunyoning eng baland binosi boʻlgan Burj-xalifagacha joʻnatadi. Hozirda tashkilot Londonda oʻzining tahririyatiga ega, shuningdek, Nyu-York (AQSH), Tokio (Yaponiya), Pekin (Xitoy) va Dubay (BAA)dagi ofislarda ham vakolatxonalari mavjud.
Yuzlab yangi yutuqlar, aql bovar qilmas imkoniyatga ega insonlar, kun sayin yangilanib borayotgan rekordlar va albatta, koʻplab hayratomuz suratlar jamlangan “Ginnes. Jahon rekordlari” kitobi yurtimizdagi eng nufuzli nashriyot “Oʻzbekiston” NMIU tomonidan ilk bor oʻzbek tilida chop etildi. Ushbu nashrni varaqlay turib, siz kitob ustida ishlagan insonlarning davr talabiga hamohang tarzda dunyoda sodir boʻlayotgan yangi voqea-hodisalardan boxabar boʻlib borayotganiga va ushbu oʻzgarishlarni yorqin suratlarda ifodalashga harakat qilayotganiga amin boʻlasiz.
Maʼlum yoʻnalishga oid boʻlgan rekordlarni topishda oʻquvchilarga qulaylik tugʻdirish maqsadida ular alohida boʻlimlarga ajratilgan. Kitobda “Dunyodagi eng uzun lagʻmon”, “Moʻyqalamda ishlangan eng katta surat”, “Pahlavon ayol”, “Kuchli sochlar egasi”, “Fidoyi oʻqituvchi” kabi yoʻnalishlar boʻyicha hamyurtlarimiz tomonidan oʻrnatilgan koʻplab qiziqarli jahon rekordlari ham oʻrin olgan boʻlib, bu Sizni beeʼtibor qoldirmasligi shubhasiz. Ishonamizki, 60 yillik tarixga ega va dunyodagi eng koʻp sotiluvchi kitoblar qatoridan muqim oʻrin egallab kelayotgan rekordlar jamlanmasi sizga olam-olam zavq bagʻishlaydi.  

Axborot xizmatlari xodimlari uchun o'quv-seminar tashkil etildi

Joriy yilning 11-12 aprel kunlari  Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligida davlat va xoʻjalik boshqaruvi organlari axborot xizmatlari faoliyati samaradorligini oshirishga qaratilgan “Axborot xizmatlari faoliyatiga oid nazariy va amaliy aspektlar” mavzusida ikki kunlik oʻquv-seminari boʻlib oʻtdi. Unda turli tashkilotlarning 60ga yaqin axborot xizmatlari xodimlari ishtirok etdilar.
      Oʻquv-seminar davomida Oʻzbekiston Milliy universiteti hamda Oʻzbekiston davlat jahon tillari universiteti mutaxassislari ishtirokida axborot xizmatlari faoliyatiga doir qonunchilik, OAV bilan samarali hamkorlik, tashkilot faoliyatida uchraydigan sterеotiplar, tashkilot imijini mustahkamlash kabi masalalar amaliy misollar yordamida muhokama qilindi.  O'quv-seminarning ikkinchi bosqichi xo'jalik boshqaruvi organlari axborot xizmatlari xodimlari uchun 18-19 aprel kunlari o'tkaziladi.

Kitoblar karvoni “Boʻka”da

Davlatimiz rahbari ijtimoiy, maʼnaviy-maʼrifiy sohalardagi ishlarni yangi tizim asosida yoʻlga qoʻyish maqsadida yoshlarga eʼtiborni kuchaytirish, ularni madaniyat, sanʼat, jismoniy tarbiya va sportga keng jalb etish, ularda axborot texnologiyalaridan foydalanish koʻnikmalarini shakllantirish, yoshlar oʻrtasida kitobxonlikni targʻib qilish, xotin-qizlar bandligini oshirish boʻyicha 5 ta muhim tashabbusni ilgari surgan edi. Yoshlarning ertangi istiqboli, maʼnaviyatimiz charxi va rivoji uchun xizmat qiluvchi ezgu tashabbuslarning amaliyotga tadbiqi Boʻkadan boshlandi.
Kuni kecha Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi, Oʻzbekiston Yozuvchilar uyushmasi, Respublika Maʼnaviyat va maʼrifat markazi hamda Oʻzbekiston Yoshlar ittifoqi hamkorligida Toshkent viloyatining Boʻka tumanida joylashgan Madaniyat markazida bayram tadbiri boʻlib oʻtdi.
“Oʻzbekiston” NMIU, “Oʻqituvchi”, “Choʻlpon”, “Sharq”, “Mashhur-press”, Oʻzbekiston milliy ensiklopediyasi kabi davlat nashriyotlari tomonidan chop etilgan kitob karvonining tumanga kirib kelishi katta tantanaga aylanib ketdi. Yoshlar qalbiga tozalik, ezgulikni singdirish, xalqimiz, jumladan, yoshlarning kitobxonlik madaniyatini yuksaltirish, ijodkorlar va kitobxonlar oʻrtasidagi muloqotni yaxshilash maqsadida tashkil etilgan kitoblar koʻrgazmasida yozuvchilarning ham ishtirok etgani oʻquvchilarda katta qiziqish uygʻotdi. Koʻrgazmaga viloyat hokimi Gʻ.Ibragimov ham tashrif buyurib, kitob yarmarkasidan ellikdan ortiq kitob xarid qilib, tumandagi beshta maktab kutubxonasiga taqdim etdi.
Oʻquvchi-yoshlar bilan oʻtkazilgan davra suhbatida Sirojiddin Sayyid, Mahmud Toir, Salim Ashur, Usmon Azim, Anvar Obidjon, Ashurali Joʻrayev, Gʻofur Shermuhammad kabi koʻplab atoqli yozuvchilar ishtirok etib, bugun yoshlarning har sohada peshqadam boʻlishi, vaqt bilan “musobaqa”da gʻolib boʻlishlari, zamon talablariga javob beradigan barkamol inson boʻlib ulgʻayishlari uchun davlatimiz tomonidan beqiyos gʻamxoʻrlik qilinayotgani, faqat maʼrifat sari qadam bosishlari, qalban inson boʻlish, oʻz-oʻzini kashf etish uchun kitob oʻqishlari lozimligi haqida fikr bildirib,  oʻz sheʼrlaridan namunalar oʻqib berdilar.  
Davra suhbatidan soʻng taniqli estrada xonandalari ishtirokida konsert dasturi namoyish etildi. Tushdan soʻng “Xalq ovozi” gazetasi tahririyatida isteʼdodli yozuvchilar tomonidan  “Mahorat darslari” oʻtkazildi. “Boʻka nihollari” iqtidorli yoshlari toʻgaragi aʼzolariga  Oʻzbekiston yozuvchilar uyushmasining “Ijod” jamoat fondi tomonidan uch yuzta badiiy kitoblar va kompyuter jamlanmasi topshirildi.
Shu kuni hamkor tashkilotlar tomonidan tumanda joylashgan mavjud 49 ta maktabning har biriga 200 tadan, mahallalarda faoliyat olib borayotgan 14 ta kutubxona, Bolalar musiqa va sanʼat maktabi hamda Mehribonlik uyiga 100 tadan, shuningdek, tumandagi oilalarga 1000dan ortiq kitoblar sovgʻa qilindi.