Убайдулла Уватов 1940 йил 23 февралда Қашқадарё вилоятининг Ғузор туманида таваллуд топган. 1958–1964 йилларда Тошкент давлат университети (ҳозирги Ўзбекистон Миллий университети) Шарқшунослик факултетининг араб филологияси бўлимида таҳсил олган. Ўзбекистон Фанлар академияси Шарқшунослик институти аспирантурасини тамомлаб, дастлаб номзодлик, сўнгра докторлик диссертациясини муваффақиятли ҳимоя қилган. Араб тили бўйича юксак малакали мутахассис сифатида Миср, Ироқ ва Ливия каби мамлакатларда таржимонлик қилган. Олим ўз фаолияти давомида масъулиятли давлат лавозимларида самарали меҳнат қилди: Ўзбекистон Республикаси Президенти администрациясида (аввалги Девон) бўлим мудири; Вазирлар Маҳкамаси ҳузуридаги Дин ишлари бўйича қўмита раисининг биринчи ўринбосари; «Амир Темур» ҳамда «Олтин мерос» халқаро хайрия жамғармалари раисининг биринчи ўринбосари. Убайдулла Уватов буюк аждодларимиз маънавий меросини тиклаш йўлида беқиёс ҳисса қўшган. У Тошкент ислом университетининг Манбалар хазинаси бўлими мудири, Имом Бухорий халқаро маркази раҳбари ҳамда умрининг сўнгига қадар Имом Термизий халқаро илмий-тадқиқот маркази директори лавозимларида фаолият юритди. Олимнинг илмий изланишлари марказида қуйидаги сиймолар ҳаёти ва мероси турган: Имом Бухорий, Имом Термизий, Ҳаким Термизий; Имом Мотуридий, Маҳмуд Замахшарий, Абу Муин Насафий; Соҳибқирон Амир Темур. Профессор жами 200 дан ортиқ мақола, 50 га яқин китоб ва рисолалар муаллифидир. Шунингдек, у моҳир педагог сифатида ўнлаб фан номзодлари ва фан докторларига раҳбарлик қилиб, ўз мактабини яратди. Кўп йиллик фидокорона хизматлари муносиб тақдирланиб, қуйидаги унвон ва орденларга лойиқ кўрилган: «Ўзбекистон Республикасида хизмат кўрсатган ёшлар мураббийси» (2017); «Меҳнат шуҳрати» ордени; «Фидокорона хизматлари учун» ордени (2020). Заҳматкаш олим ва жамоат арбоби 2020 йил 3 ноябрда вафот этди.
