Замонавий адабиётда «Даҳшатлар қироли» унвонига сазовор бўлган ягона ёзувчи Стивен Кингнинг ҳаёти унинг ўз романларидан ҳам қизиқарлироқдир. 1947 йилда АҚШнинг Мэн штатида туғилган Стивен жуда камбағал болаликни бошидан кечирди. Отаси оиласини ташлаб кетгач, онаси тинимсиз меҳнат қилиб болаларини боқди. Ёш Стивен тирикчилик учун кирхона ишчиси, фаррош ва мактаб ўқитувчиси бўлиб ишлади, аммо ёзишни ҳеч қачон тўхтатмади. Унинг тақдири битта воқеа туфайли ўзгариб кетди: у «Кэрри» номли романини ёзиб тугатгач, асар ўзига ёқмай, уни ахлат қутисига улоқтиради. Хайриятки, унинг рафиқаси Табита қўлёзмани ахлатдан топиб олади, чангини қоқиб, эрини уни нашриётга юборишга мажбур қилади. Айнан шу китоб унга катта бойлик ва машҳурлик олиб келди. Стивен Кинг инсонни нима қўрқитишини жуда яхши билади. У шунчаки махлуқлар ёки шарпалар ҳақида ёзмайди, балки инсон психологиясининг энг қоронғу бурчакларига назар ташлайди. Унинг «Ялтироқ» (The Shining), «У» (It) ва «Уй ҳайвонлари қабристони» каби асарлари китобхонни тонггача чироқни ўчирмасдан ўтиришга мажбур қилади. Лекин Кинг фақат қўрқинчли асарлар муаллифи эмас. Дунёдаги энг таъсирли фильмлардан бири бўлган «Шоушенкдан қочиш» (The Shawshank Redemption) ва «Яшил маскан» (The Green Mile) фильмлари айнан унинг асарлари асосида суратга олинганини кўпчилик билса керак. Бу асарларда у инсон иродаси ва умиднинг сўнмас кучини мадҳ этган. 1999 йилда ёзувчи даҳшатли автоҳалокатга учради. Уни сайр қилиб юрганида юк машинаси уриб кетди ва шифокорлар унинг қайта юра олишига шубҳа қилишди. Аммо темир иродали Кинг нафақат оёққа турди, балки оғриқларни енгиб, яна ёзишда давом этди. Бугунги кунда 70 ёшдан ошган бўлса-да, у ҳар куни камида 2000 сўз ёзиш одатини канда қилмайди. У ўз меҳнати билан оддий кирхона ишчиси ҳам дунё таниган ёзувчига айланиши мумкинлигини исботлади.
